WTC27 අවසන් මහා තරගයට පිවිසීමේ බංග්ලාදේශ අපේක්ෂාව සිමන්ස් අවධාරණය කරයි
ජාත්‍යන්තර ක්‍රිකට් කවුන්සිලයපුවත
ඔක්තෝබර් 28 වැනිදා මිර්පූර්හි ආරම්භ වන බටහිර ඉන්දීය කොදෙව් සමඟ ටෙස්ට් තරගාවලියට පෙර, ICC ලෝක ටෙස්ට් ශූරතාවලියේ 2025/27 අවසන් මහා තරගයේ (WTC) ක්‍රීඩා කිරීමේ අපේක්ෂාව තම පිලට ගාමක බලවේගයක් වී ඇති බව බංග්ලාදේශ ප්‍රධාන පුහුණුකරු ෆිල් සිමන්ස් පැවසීය.
55.56ක ලකුණු ප්‍රතිශතයක් සමඟ බංග්ලාදේශය මේ වනවිට ICC WTC ශ්‍රේණිගත කිරීම්වල හතරවැනි ස්ථානයේ පසුවේ.
“ලෝක ටෙස්ට් ශූරතාවලියේ \[අවසන් මහා තරගයේ\] ක්‍රීඩා කිරීමේ ඉලක්කයක් සහ ආශාවක් තිබෙනවා කියා මම හිතනවා," යැයි තරගාවලියේ පළමු ටෙස්ට් තරගයට පෙර සිමන්ස් පැවසීය.
වත්මන් WTC චක්‍රය ආරම්භයේ ශ්‍රී ලංකාවට එරෙහිව තරගාවලිය පරාජය වීමෙන් පසු, බංග්ලාදේශය නැගී සිටිමින් පාකිස්තානය 2-0ක් ලෙස පරාජය කළ අතර, ඕස්ට්‍රේලියාවේ ජය පරාජයෙන් තොරව අවසන් වූ තරගාවලියකදී ඉතිහාසගත ජයක්ද වාර්තා කළේය. බටහිර ඉන්දීය කොදෙව් සමඟ තරගාවලියද ඇතුළත් ස්වදේශීය තරගාවලි දෙකක් සහ දකුණු අප්‍රිකාවේ සංචාරයක් සමඟ, අවසන් මහා තරගයට පිවිසීමේ අවකාශය තවමත් බංග්ලාදේශයට පවතී.
"අපට එහි සිටීමේ අවස්ථාව ලැබෙන පළමු අවස්ථාව මෙයයි. එම නිසා සියලු දෙනා ටෙස්ට් තරග සඳහා උද්‍යෝගයෙන් සූදානම් වෙනවා කියා මම හිතනවා."
බංග්ලාදේශයේ අවසන් ටෙස්ට් කාර්යය වූයේ අබුඩාබිහිදී ඇෆ්ගනිස්තානයට එරෙහිව පැවති එක් ටෙස්ට් තරගයකි.
කාසියේ වාසිය දිනාගත් බංග්ලාදේශය පළමු ඉනිමේදී යහපත් ලකුණු පෙරමුණක් ගත් අතර, පසුව දෙවැනි ඉනිම ප්‍රකාශයට පත් කරමින් ඇෆ්ගනිස්තානයට ලකුණු 479ක අපහසු ඉලක්කයක් ලබා දුන්නේය.
එහෙත් ඇෆ්ගනිස්තානය අවසන් ඉනිමේදී විශිෂ්ට සටනක් දක්වමින් ජය පරාජයෙන් තොරව තරගය අවසන් කර ගැනීමට සමත් විය.
ඇෆ්ගනිස්තානය පරාජය කිරීමට බංග්ලාදේශයට හැකියාව තිබූ බව සිමන්ස් විශ්වාස කරන නමුත්, විශේෂයෙන් දෙවැනි ඉනිමේදී බංග්ලාදේශ පිතිකරුවන් තම ලකුණු රැස්කිරීමේ වේගය සකස් කරගත් ආකාරය සම්බන්ධයෙන්, තම ක්‍රීඩකයන් තරග තත්ත්වය වැරදියට කියවූ බවට වන යෝජනා ඔහු බැහැර කළේය.
“ඔවුන් තරග තත්ත්වයට ප්‍රතිචාර නොදැක්වූ අවස්ථාවක් ලෙස මම එය දකින්නේ නැහැ. අපි ක්‍රීඩා කරන්න බලාපොරොත්තු වූ ආකාරයටම ඔවුන් ක්‍රීඩා කළා කියා මම හිතනවා," යැයි ඔහු පැවසීය
"අපි හිතුවාට වඩා පිටිය හොඳ වුණා. අපට ධාවනදැවීමක් මග හැරුණා; උඩපන්දු කිහිපයක් අතහැරුණා. ඒ නිසා දවස අවසානයේ අපි තරගය ජය ගත යුතුව තිබුණා, නමුත් අපි වැරදි විදියට ක්‍රීඩා කළා කියා මම හිතන්නේ නැහැ,” යැයි ඔහු වැඩිදුරටත් පැවසීය.
බටහිර ඉන්දීය කොදෙව් වෙනුවෙන් තුන් ඉරියව් ක්‍රීඩකයකු ලෙස ක්‍රීඩා කළ සිමන්ස්, 2021 වසරේ ප්‍රසිද්ධ 2-0 ටෙස්ට් තරගාවලි ජයග්‍රහණය ඇතුළුව අතීතයේ එම පිලේ පුහුණුකරු ලෙසද කටයුතු කර ඇත. එම තරගාවලියේ පළමු ටෙස්ට් තරගයේදී ලකුණු 395ක ඉලක්කයක් හඹා ගිය සංචාරක පිලට කයිල් මේයර්ස් ද්විශතකයක් වාර්තා කළේය.
විපක්ෂ පුහුණුකරුවකු ලෙස බංග්ලාදේශයට කළ අතීත සංචාර සතුටින් සිහිපත් කළ සිමන්ස්, බංග්ලාදේශ පුහුණුකරු ලෙස තම පිලට ජය ගෙන ඒම සඳහා පූර්ණ කැපවීමෙන් සිටින බවද පැවසීය.
“එම සංචාරය ගැන මට ඉතා හොඳ, ප්‍රසන්න මතකයන් තිබෙනවා. මම ජය ගත් පිලේ නායකයා වුණා, එහෙම මතකයන්ම මෙහිදීත් ජය ගත් පිලේ ජයග්‍රාහකයා විදියට ලැබේවි කියා බලාපොරොත්තු වෙනවා,” යැයි සිමන්ස් පැවසීය.
“අනේ මේ බටහිර ඉන්දීය කොදෙව් නේ කියා කියන තරම් හැඟුම්බරකමක් මට නැහැ. ඔවුන් වෙන කෙනෙකුට එරෙහිව ක්‍රීඩා කරන විට මම ඔවුන්ගේ පැත්තේ. ඔවුන්ට එරෙහිව ක්‍රීඩා කරන විට මට තවමත් තරගාවලිය ජය ගන්න ඕන.”
තරගාවලි කාල සටහන
පළමු ටෙස්ට් තරගය, ඔක්තෝබර් 28 සිට නොවැම්බර් 1 දක්වා, මිර්පූර්
දෙවැනි ටෙස්ට් තරගය, නොවැම්බර් 5 සිට 9 දක්වා, සිල්හෙට්
ජාත්‍යන්තර ක්‍රිකට් කවුන්සිලය වාර්තාකරණය මත පදනම්ව