පාකිස්තාන සයිබර් අපරාධ විමර්ශකයෝ රිස්වාන් සහ ඉමාම්ගෙන් ප්‍රශ්න කරති

පාකිස්තානයේ අසාර්ථක එංගලන්ත ටෙස්ට් සංචාරයෙන් ඇති වූ ප්‍රතිවිපාක තවදුරටත් දිගහැරෙමින් තිබියදී, මොහොමඩ් රිස්වාන් සහ ඉමාම්-උල්-හක්ගෙන් ලාහෝර්හිදී පාකිස්තාන ජාතික සයිබර් අපරාධ විමර්ශන ඒජන්සිය (NCCIA) ප්‍රශ්න කළේය.

ලෝඩ්ස්හි පැවති දෙවැනි ටෙස්ට් තරගයේ පරාජයෙන් පසු පාකිස්තාන සංචිතයෙන් ඉවත් කර යළි සිය රටට යැවූ ක්‍රීඩකයන් හත්දෙනා අතර සිටි ඔවුන් දෙදෙනාට NCCIA හමුවේ පෙනී සිටින ලෙස සිතාසි යවා තිබිණි. ඔවුහු බ්‍රහස්පතින්දා එහි පෙනී සිටියහ. අවම වශයෙන් එක් ක්‍රීඩකයකු පැය කිහිපයක් එහි රැඳී සිට ඇති බව විශ්වාස කෙරේ.

ප්‍රශ්න කිරීම කුමක් සම්බන්ධයෙන් සිදු වූයේද, නැතහොත් එය මේ සතිය මුලදී ප්‍රකාශයට පත් කළ PCB විමර්ශනයට සම්බන්ධද යන්න තවමත් පැහැදිලි නැත. එහිදී කිසිදු ක්‍රීඩකයකු නම් නොකළ මණ්ඩලය, "විනය සහ හැසිරීම සම්බන්ධයෙන් පළ වූ මාධ්‍ය වාර්තා අනුව අභ්‍යන්තර විනය පරීක්ෂණයක් ආරම්භ කර ඇති අතර, ඒවා මේ වන විට අභ්‍යන්තරව සමාලෝචනය කෙරෙමින් පවතී" යැයි සඳහන් කළේය. එම ක්‍රියාවලිය "PCB රෙගුලාසි යටතේ සිදු කෙරෙන" බවද මණ්ඩලය පැවසීය.

Sportway.lk:පිළිගැනීමේ ප්‍රසාද මුදලRs. 10,000 දක්වා ලබාගන්න!තැන්පතුවට 50% ප්‍රසාද මුදලක් භුක්ති විඳින්නප්‍රසාද මුදල ලබාගන්න* නියමයන් සහ කොන්දේසි අදාළ වේSportway.lk:පිළිගැනීමේ ප්‍රසාද මුදලRs. 10,000 දක්වා ලබාගන්න!තැන්පතුවට 50% ප්‍රසාද මුදලක් භුක්ති විඳින්නප්‍රසාද මුදල ලබාගන්න* නියමයන් සහ කොන්දේසි අදාළ වේ

අවම වශයෙන් එක් ක්‍රීඩකයකුට පිළිතුරු සපයා ලබන සතියේ NCCIA වෙත ආපසු භාරදීම සඳහා ප්‍රශ්නාවලියක් ලබා දී ඇති බව ක්‍රික්ඉන්ෆෝ වෙත වාර්තා වේ.

පළමු ටෙස්ට් තරගය ඉනිමකින් සහ ලකුණු 103කින් පරාජය වූ පාකිස්තානය, ලෝඩ්ස් ටෙස්ට් තරගයද ලකුණු 194කින් පරාජය වීමෙන් පසු ක්‍රීඩකයන් හත්දෙනකු මෙන්ම ප්‍රධාන පුහුණුකරු සර්ෆරාස් අහමඩ් සහ පන්දු යැවීමේ පුහුණුකරු උමාර් ගුල්ද සංචිතයෙන් ඉවත් කෙරිණි. ඔවුන් වෙනුවට තවත් ක්‍රීඩකයන් හත්දෙනකු එංගලන්තයට ගිය අතර, ඔවුන්ගෙන් පස්දෙනකු ඒ වන විට ජාත්‍යන්තර මංගල තරගයට ක්‍රීඩා කර නොතිබිණි.

මෙම සංචාරයේදී රිස්වාන්ගේ පිතිකරණ දස්කම් දුර්වල වූ අතර, ඔහු ලකුණු 12, 41, 7 සහ 1ක් රැස් කළේය. ඊට පෙර කැරිබියන් දූපත්හි පැවති ටෙස්ට් තරග දෙකේදීද ඔහුට ඉහළ ලකුණු රැස් කිරීමට නොහැකි විය. කෙසේ වෙතත්, සංචාර දෙකේදීම ඔහුගේ කඩුලු රැකීම විශිෂ්ට වූ අතර, බටහිර ඉන්දීය කොදෙව් තරගාවලිය දක්වා 2024 ජනවාරි මාසයේ සිට පාකිස්තානය වෙනුවෙන් වැඩිම ටෙස්ට් ලකුණු රැස් කළ පිතිකරු වූයේද ඔහුය. එහෙත් ලෝඩ්ස් තරගයේ දෙවැනි ඉනිමේදී අපහසු ඉරියව්වකින් එල්ල කළ ප්‍රහාරයක් හේතුවෙන් ලකුණු 1කට දැවී යාම දැඩි විවේචනයට ලක් විය.

මේ අතර, ලෝඩ්ස්හි පළමු දිනයේ තරගය අවසන් වීමෙන් පසු ඉමාම්ගේ වම් කෙණ්ඩා මාංශපේශියේ 1 ශ්‍රේණියේ ඉරීමක් ඇති බව හඳුනාගත් අතර, පාකිස්තාන ඉනිම් දෙකේදීම ඔහු පිටියට පැමිණියේ නැත. අවසන් දින උදෑසන තරගයට පෙර උණුසුම් වීමේ අභ්‍යාස අතරතුර සැහැල්ලු පන්දු කිහිපයකට පහර දීමට ඔහු පැමිණියද, ශාරීරිකව අපහසුතාවට පත් විය. PCB ප්‍රධාන තේරීම් නිලධාරී සහ ඉහළ කාර්යසාධන අධ්‍යක්ෂ ආකිබ් ජාවෙඩ්, ඉමාම්ගේ ආබාධය ප්‍රසිද්ධියේ ප්‍රශ්න කරමින් ඒ සම්බන්ධයෙන් පරීක්ෂණයක් පැවැත්වෙනු ඇතැයි අනතුරු ඇඟවීය.

සංචිතයේ සිදු කළ වෙනස්කම් සාධාරණීකරණය කරමින් PCB සභාපති මොහ්සින් නක්වි, වැඩිදුර විස්තර නොදක්වා ඊට බලපෑ පුළුල් සාධක පිළිබඳව ඉඟි කළේය. "ඊට හේතු සොයා බැලීම සඳහා අප සාකච්ඡාවක් පැවැත්වූවා. දක්ෂතාවලින් ඔබ්බට ගිය සාධකද ඒ අතර තිබෙනවා. අපි ඒ පිළිබඳ සම්පූර්ණ සත්‍යය සොයා ගන්නවා."

බටහිර ඉන්දීය කොදෙව් සහ එංගලන්ත සංචාර සඳහා ක්‍රීඩකයන් දෙදෙනාම තෝරා ගැනීම සම්බන්ධයෙන්ද ලෝඩ්ස් ටෙස්ට් තරගයෙන් පසු PCB තේරීම් නිලධාරීන් වෙත දැනුම්දීමක් යවා තිබිණි. ඔවුන් තෝරා ගැනීමට හේතු සහ එම තීරණයට එළඹි ක්‍රියාවලිය සඳහන් ලිඛිත පැහැදිලි කිරීමක්, දැනුම්දීම ලැබී පැය 24ක් ඇතුළත ලබා දෙන ලෙස එයින් ඉල්ලා තිබිණි. සංචිතයේ වෙනස්කම්වලින් පසු තේරීම් නිලධාරියකු වූ මිස්බා-උල්-හක් සිය ධුරයෙන් ඉල්ලා අස් විය.

රිස්වාන්ට සහ ඉමාම්ට ජනාධිපති කුසලාන තරගාවලිය තහනම් කෙරේ

සැප්තැම්බර් 12 වැනිදා ඇරඹෙන පළමු පෙළ ජනාධිපති කුසලාන තරගාවලියට ක්‍රීඩා කිරීමද රිස්වාන්ට සහ ඉමාම්ට තහනම් කර ඇති නමුත්, ඊට හේතුව ඔවුන් ශාරීරික යෝග්‍යතා පරීක්ෂණ සඳහා පෙනී නොසිටීමය. මෙම තරගවාරයේ සිට දේශීය තරගාවලිවලට සහභාගී වන සියලු ක්‍රීඩකයන්ට ශාරීරික යෝග්‍යතා පරීක්ෂණ අනිවාර්ය කිරීමට PCB පියවර ගෙන ඇති අතර, මෙම ක්‍රීඩකයන් දෙදෙනා එම පරීක්ෂණයට සහභාගී නොවීමෙන් පසු ජනාධිපති කුසලාන තරගාවලියට ක්‍රීඩා කිරීමට නුසුදුසු වූ බව ක්‍රික්ඉන්ෆෝ වෙත වාර්තා වේ.

PCB සැප්තැම්බර් 10 වැනිදා, තරගාවලිය ආරම්භ වීමට දින දෙකකට පෙර ප්‍රකාශයට පත් කළ ජනාධිපති කුසලාන තරගාවලි සංචිතවල OGDCL නායකයා ලෙස ඉමාම්ද, SNGPL උප නායකයා ලෙස රිස්වාන්ද නම් කර තිබිණි.