පාකිස්තාන ටෙස්ට් සංචිතයට යළි එක්වීම අෆ්රිඩිගේ ප්‍රමුඛ අරමුණක්
ජාත්‍යන්තර ක්‍රිකට් කවුන්සිලයපුවත
පාකිස්තාන ටෙස්ට් කණ්ඩායමට යළි එක්වීම තවමත් තම ප්‍රමුඛ අරමුණ බව ෂහීන් ෂා අෆ්රිඩි පැහැදිලි කර තිබේ. ඔහු සෙනසුරාදා ජනාධිපති කුසලාන තරගාවලියට එක්වූ අතර, එය 2019න් පසු ඔහු දේශීය තරග බිමේ රතු පන්දුවෙන් ක්‍රීඩා කළ පළමු තරග අවස්ථාව විය.
බටහිර ඉන්දීය කොදෙව් සහ එංගලන්ත සංචාර සඳහා නම් කළ සංචිතවලට ඇතුළත් නොකෙරුණු මෙම වමත් වේග පන්දු යවන්නා මේ වන විට ටෙස්ට් කණ්ඩායමෙන් පිටත සිටියි. 2018දී ටෙස්ට් වරම් ලැබූ දා සිට අෆ්රිඩි තරග 34කදී කඩුලු 126ක් දවාගෙන තිබේ.
“මගේ මුල් තැන හැමදාමත් හිමිවෙන්නේ රතු පන්දුවේ ක්‍රිකට් ක්‍රීඩාවටයි,” අෆ්රිඩි පැවසීය.
“මම හැමදාමත් ඒකට ආදරය කළා. ජාත්‍යන්තර ක්‍රිකට් නිසා ඒ සඳහා ප්‍රමාණවත් කාලයක් ලැබුණේ නැහැ. ඒත් පසුගිය මාස දෙකක පමණ කාලය තුළ මම වැඩිපුර ක්‍රිකට් ක්‍රීඩා කළේ නැහැ. ඒ නිසා මේක රතු පන්දුවෙන් ක්‍රීඩා කරන්න ලැබෙන අවස්ථාවක්.”
එංගලන්තය හමුවේ ICC ලෝක ටෙස්ට් ශූරතාවලියට අයත් තරගාවලියක් 3-0ක් ලෙස පරාජය වී සිටින පාකිස්තාන ටෙස්ට් කණ්ඩායමට, අෆ්රිඩිගේ යළි පැමිණීමේ ගමන සුබදායී වනු ඇතැයි පාකිස්තානය බලාපොරොත්තු වනු ඇත.
තරග රටා තුනේම ජාත්‍යන්තර තරගවලින් පිරුණු කාලසටහන හේතුවෙන් මෑත කාලයේ දිගු කාල පරාසයන් තුළ අෆ්රිඩිට රතු පන්දුවේ රිද්මය පවත්වාගැනීමට අවස්ථාව නොලැබිණි.
ඔහු තවදුරටත් පාකිස්තාන එක්දින කණ්ඩායමේ නායකයා ලෙස කටයුතු කරයි. කාලසටහනේ මීළඟට ඇත්තේ එංගලන්තය සහ ශ්‍රී ලංකාව සමග සිය රටේ පැවැත්වෙන තුන්කොන් තරගාවලියකි. ඉන් අනතුරුව වසරේ පසු භාගයේ ශ්‍රී ලංකාවට සහ නවසීලන්තයට එරෙහිව සිය රටේ ටෙස්ට් තරගාවලි පැවැත්වීමට නියමිත අතර, ඔහුගේ අවධානය එම තරගාවලි වෙත යොමු වනු ඇත.
“මගේ අයියා රියාස් අෆ්රිඩිගෙන් මම ගොඩක් දේවල් ඉගෙනගත්තා. ඔහු පළමු පෙළ ක්‍රිකට් ගොඩක් ක්‍රීඩා කරලා තියෙනවා,” ඔහු පැවසීය.
“දිගු තරග රටාවේදී ඔබ පිටියේ ගත කරන කාලය වැඩි වන තරමට, ඒක ඔබේ ආත්ම විශ්වාසයටත් පන්දුව යවන දිශාව සහ පතිත කරන දුර වඩාත් නිවැරදි කරගැනීමටත් (වඩා හොඳයි).”
පන්දු යැවීමේදී තම ප්‍රවේශය, පාකිස්තානය වෙනුවෙන් සුදු ඇඳුමින් ක්‍රීඩා කරද්දී ප්‍රේක්ෂකයන් දැක ඇති ආකාරයටම වන බව අෆ්රිඩි පැහැදිලි කළේය.
“ටෙස්ට් ක්‍රිකට්වලදී පන්දු යැවූ ආකාරයටම පළමු පෙළ ක්‍රිකට්වලදීත් පන්දු යවන්න මම උත්සාහ කරනවා,” අෆ්රිඩි පැවසීය.
ඔහු අවසන් වරට රතු පන්දුවෙන් දිගටම ක්‍රීඩා කළ කාලයෙන් පසු සැලකිය යුතු කාලයක් ගතවී තිබේ. ටෙස්ට් ක්‍රිකට්වලින් ඈත්ව සිටියදීත් සුදු පන්දුවේ තරග රටාවල කාර්යබහුලව ක්‍රීඩා කිරීමෙන් පසු යළි රතු පන්දුවට හැඩගැසීමේදී අභියෝග මතුවන බව අෆ්රිඩි පිළිගත්තේය.
“පසුගිය මාස කිහිපය තුළ මම රතු පන්දුවෙන් ක්‍රීඩා කළේ නැහැ. ඊට කලින් මම අඛණ්ඩව රතු පන්දුවෙන් ක්‍රීඩා කරමින් හිටියා,” ඔහු පැවසීය.
“ජාත්‍යන්තර ක්‍රිකට් ක්‍රීඩා කරන කෙනෙකුට යළි දේශීය ක්‍රිකට්වලට පැමිණීම අභියෝගයක් වෙන්න පුළුවන්. මොකද තරග රටා තුනේම නොකඩවා ජාත්‍යන්තර ක්‍රිකට් ක්‍රීඩා කරන නිසා ඔබ කාර්යබහුල වෙනවා. විවේකයක් ලැබුණාම දේශීය ක්‍රිකට් ක්‍රීඩා කළ යුතුයි.”
එක්දින ක්‍රිකට් පිටියේදීත් පන්දුවෙන් සිය දක්ෂතාව දිගින් දිගටම පෙන්නුම් කර ඇති අෆ්රිඩි, පසුගියදා අවසන් වූ චැම්පියන්ස් කුසලාන තරගාවලියේ වැඩිම කඩුලු ලාභියා බවට පත්විය. සිය කණ්ඩායම එම තරගාවලියේ ශූරතාව කරා මෙහෙයවූ ඔහු අවසන් මහා තරගයේදී 7/36ක පන්දු යැවීමේ දක්ෂතාවක් වාර්තා කළේය.
මෙම චක්‍රයේ මෙතෙක් ක්‍රීඩා කළ තරග නවයෙන් දෙකක් පමණක් ජයගෙන ඇති පාකිස්තානය මේ වන විට ලෝක ටෙස්ට් ශූරතා (WTC) ප්‍රසාද ලකුණු සටහනේ නවවැනි ස්ථානයේ පසුවෙයි.
ජාත්‍යන්තර ක්‍රිකට් කවුන්සිලය වාර්තාකරණය මත පදනම්ව