තුවාලයෙන් නැවත පැමිණි පාකිස්තාන වේග පන්දු යවන්නාගේ ඉලක්කය තවත් ඉහළට
ජාත්‍යන්තර ක්‍රිකට් කවුන්සිලයපුවත
ICC පිරිමි ක්‍රිකට් ලෝක කුසලාන ප්‍රවේශපත් ලොතරැයිය සඳහා ලියාපදිංචි වන්න
බොහෝ දෙනා අපේක්ෂාවෙන් සිටි තම දේශීය ජාත්‍යන්තර ක්‍රිකට් සමය පාකිස්තානය ආරම්භ කළේ ශ්‍රී ලංකාවට එරෙහි 2-1 T20I තරගාවලි ජයග්‍රහණයකින් වන අතර, නැවත පිලට එක් වූ නසීම් ෂා ද එම ජයේ කාර්යභාරයක් ඉටු කළේය.
පළමු T20I තරගයේ තම පන්දුවාර හතරේ 3/36ක දස්කමක් එම වේග පන්දු යවන්නා දැක්වීය. දෙවැනි T20I තරගයේ කඩුල්ලක් දවා ගැනීමට නොහැකි වූ නමුත්, පවර්ප්ලේ අවස්ථාවේ යැවූ පන්දුවාර දෙකේ ලබා දුන්නේ ලකුණු නවයක් පමණක් වූ අතර, ඉනිමේ ආරම්භක අවධියේ ශ්‍රී ලංකාව සීමා කිරීමට එම විනයගරුක දස්කම හේතු විය.
PCB Digital සමඟ නසීම් තම ප්‍රවේශය පිළිබඳව අදහස් දැක්වීය.
“ලෝකය පුරා පිටිවල ස්වභාවය සහ විනෝදාස්වාදය කෙරෙහි ඇති අවධානය (පිතිකරණයට හිතකර කඩුලු අතින්) සැලකිල්ලට ගත් විට, නූතන සුදු පන්දු ක්‍රිකට්හි පිතිකරුවාගේ මානසිකත්වය සමඟ සෙල්ලම් කිරීමට ඔබට සිදු වෙනවා,” පන්දු යවන්නෙකුට සාර්ථකත්වය ලබා ගත හැක්කේ කෙසේද යැයි විමසූ විට නසීම් පැවසීය.
“මේ කාලයේ පන්දු යවන්නෙකු ලෙස වඩාත් දක්ෂ හා දියුණු විය යුතුයි."
එංගලන්තය සහ ශ්‍රී ලංකාව සහභාගී වන ඉදිරි එක්දින ත්‍රිකෝණ තරගාවලිය සඳහා පාකිස්තාන සංචිතයට ද නසීම් ඇතුළත් වී සිටී.
දකුණු අප්‍රිකාවේ පැවැත්වෙන ICC ක්‍රිකට් ලෝක කුසලාන 2027 සඳහා සූදානම ෂහීන් ෂා අෆ්‍රිදිගේ නායකත්වය යටතේ පිල ආරම්භ කිරීමට සැරසෙන අතර, එක්දින ආකෘතියේ දස්කම් දක්වා අවසානයේ තමාගේ මංගල ICC ක්‍රිකට් ලෝක කුසලානයට සහභාගී වීමට නසීම් දැඩි අපේක්ෂාවෙන් සිටී. එහි පාකිස්තානයේ තරගාවලිය ආරම්භ වන්නේ 2027 ඔක්තෝබර් 8 වැනිදා ඇෆ්ගනිස්තානයට එරෙහිවය.
එක්දින තරග 34කදී 25.91ක සාමාන්‍යයක් සහ 28.3ක ලකුණු රැස්කිරීමේ වේගයක් සමඟ නසීම් කඩුලු 60ක් දවා ගෙන ඇත. ඒ අතර කඩුලු පහක දස්කම් දෙකක් ද ඇත.
“මගේ උපරිම ක්‍රිකට් තවම ක්‍රීඩා කර නැහැ කියලා මට හිතෙනවා,” ඉදිරිය දෙස බලමින් ඔහු තහවුරු කළේය.
“මා මේ දක්වා ක්‍රීඩා කළ ක්‍රිකට්හි, විශේෂයෙන් ටෙස්ට් ක්‍රිකට්හි, කරුණු කිහිපයක් අඩු වුණා කියලා හිතනවා.
“මගේ සරල ඉලක්කය තමයි, මගේ ඉලක්ක හෝ දස්කම් ගැන හයියෙන් කතා කරන්න අවශ්‍ය නොවන තරමට දස්කම් දැක්වීම.
“තුවාල අඩු වෙලා, හොඳ රිද්මයකින් පන්දු යවන විට, හැම දෙයක්ම තිබිය යුතු තැනට සකස් වෙනවා.”
බංග්ලාදේශ පිතිකරණය බිඳ දමමින්, වයස 16දී ටෙස්ට් ක්‍රිකට්හි හැට්රික් එකක් ලබා ගත් තරුණතම පන්දු යවන්නා බවට පත් වූ විට නසීම්ගේ හැකියාව පැහැදිලිව පෙනී ගියේය.
ළාබාල වයසේදී දීප්තිමත් ආරම්භයක් ලැබුණද, වසර හතක ක්‍රීඩා ජීවිතයේ තුවාල හේතුවෙන් පිටතට වී සිටි 23 හැවිරිදි ඔහුට පසුබෑම් ද අමුතු දෙයක් නොවේ.
“තුවාලයක් වූ විට ඔබ නැවත ශුන්‍යයට යනවා. සමහර විට ක්‍රීඩාවේ චලන රටා කරන එක පැත්තකින් තියලා, දුවන්නවත් ඉඩ ලැබෙන්නේ නැහැ,” නසීම් පැවසීය.
“එවිට පුනරුත්ථාපන වැඩසටහන වැදගත් වෙනවා. එම කාලය තුළ ඔබ ඔබේ ශරීරය කොතරම් හොඳින් තේරුම් ගන්නවාද කියන එකත් තීරණාත්මකයි. හොඳ වෛද්‍ය කණ්ඩායමක් ඔබ වටා සිටීමත් උපකාරී වෙනවා,” ඔහු වැඩිදුරටත් පැවසීය.
එක්දින ත්‍රිකෝණ තරගාවලියේ පළමු තරගයේදී ඉරිදා පාකිස්තානය ශ්‍රී ලංකාවට එරෙහිව තරග වදින අතර, දින දෙකකට පසු එංගලන්තයට එරෙහිව තරග වදී.
ඉහළම පිල් දෙක අවසන් මහා තරගයට පිවිසීමට පෙර, කණ්ඩායම් තුන එකිනෙකා සමඟ දෙවරක් තරග වදිනු ඇත.
එක්දින ත්‍රිකෝණ තරගාවලියේ කාලසටහන
ඔක්තෝබර් 18: පාකිස්තානය එදිරිව ශ්‍රී ලංකාව, රාවල්පිණ්ඩි ක්‍රිකට් ක්‍රීඩාංගනය, රාවල්පිණ්ඩි
ඔක්තෝබර් 20: පාකිස්තානය එදිරිව එංගලන්තය, රාවල්පිණ්ඩි ක්‍රිකට් ක්‍රීඩාංගනය, රාවල්පිණ්ඩි
ඔක්තෝබර් 22: ශ්‍රී ලංකාව එදිරිව එංගලන්තය, රාවල්පිණ්ඩි ක්‍රිකට් ක්‍රීඩාංගනය, රාවල්පිණ්ඩි
ඔක්තෝබර් 25: පාකිස්තානය එදිරිව එංගලන්තය, ගඩාෆි ක්‍රීඩාංගනය, ලාහෝර්
ඔක්තෝබර් 27: පාකිස්තානය එදිරිව ශ්‍රී ලංකාව, ගඩාෆි ක්‍රීඩාංගනය, ලාහෝර්
ඔක්තෝබර් 29: ශ්‍රී ලංකාව එදිරිව එංගලන්තය, ගඩාෆි ක්‍රීඩාංගනය, ලාහෝර්
ඔක්තෝබර් 31: අවසන් මහා තරගය, ගඩාෆි ක්‍රීඩාංගනය, ලාහෝර්
ජාත්‍යන්තර ක්‍රිකට් කවුන්සිලය වාර්තාකරණය මත පදනම්ව