පාකිස්තාන පිතිකරුවෙකු ලබා ගත් වේගවත්ම ප්‍රථම පෙළ ශතකය මුහම්මද් ෂාසාඩ්ගෙන්
ESPNcricinfoපුවත
පන්දු 49කින් පමණක් එම සන්ධිස්ථානයට ළඟා වූ ඔහු, මිස්බා උල් හක් විසින් පිහිටුවා තිබූ පෙර වාර්තාව බිඳ දැමීය.
පන්දු 49කින් පමණක් ශතකය සම්පූර්ණ කරමින්, පාකිස්තාන පිතිකරුවෙකු ලබා ගත් වේගවත්ම ප්‍රථම පෙළ ශතකයේ වාර්තාව මුහම්මද් ෂාසාඩ් බිඳ දමා ඇත.
ජනාධිපති කුසලානයේ තුන්වැනි වටයේ පළමු දිනයේදී ඉස්ලාමාබාද් හි ඩයමන්ඩ් ක්‍රිකට් ක්‍රීඩාංගණයේදී කිංග්ස්මන් ඇකඩමියට එරෙහිව පාකිස්තාන් ටෙලිවිෂන් වෙනුවෙන් පන්දු 62කදී ලකුණු 114ක ඉනිමක් ක්‍රීඩා කළ මෙම දකුණත් පිතිකරු හයේ පහර අටක් සහ හතරේ පහර 12ක් එල්ල කළේය.
තරග 21කදී ෂාසාඩ් ලබා ගත් හයවැනි ප්‍රථම පෙළ ශතකය මෙයයි. පස්වැනි ස්ථානයේ පිතිකරණයට පැමිණි ඔහු, PTV පිල 34/3ක් ලෙස අසීරු තත්ත්වයක සිටියදී ක්‍රීඩා පිටියට පිවිසි අතර, ලකුණු 43ක් රැස් කළ මොහොමඩ් තාහා සමඟ ලකුණු 143ක සබඳතාවක් ගොඩනැගීය. ෂාසාඩ් ලිස්ට් A තරග 22ක් සහ T20 තරග 26ක් ද ක්‍රීඩා කර ඇත. 2025 වාරයේදී ඉස්ලාමාබාද් යුනයිටඩ් වෙනුවෙන් PSL මංගල තරගයට එක් වූ ඔහු එහිදී තරග හයක් ක්‍රීඩා කළේය.
මීට පෙර පාකිස්තාන පිතිකරුවෙකු ලබා ගත් වේගවත්ම ප්‍රථම පෙළ ශතකයේ වාර්තාව හිමිව තිබුණේ 2014 දී අබුඩාබි හිදී පැවති දෙවැනි ටෙස්ට් තරගයේදී ඕස්ට්‍රේලියාවට එරෙහිව පන්දු 56කින් ශතකයක් ලබා ගත් මිස්බා උල් හක් සතුවය. එවකට මිස්බා වේගවත්ම ටෙස්ට් ශතකය සඳහා විව් රිචඩ්ස්ගේ වාර්තාවට සමවිය. එහෙත් වසර දෙකකට පසු ක්‍රයිස්ට්චර්ච් හිදී පැවති තරගාවලියේ දෙවැනි ටෙස්ට් තරගයේදී ඕස්ට්‍රේලියාවට එරෙහිව පන්දු 54කින් ශතකයක් ලබා ගත් බ්‍රෙන්ඩන් මැකලම් එම වාර්තාව බිඳ දැමීය.
PCB හි වයස් කාණ්ඩ වැඩසටහන හරහා ඉදිරියට පැමිණි ෂාසාඩ් පාකිස්තානයේ වයස අවුරුදු 16න් සහ U19 පිල් වෙනුවෙන් ක්‍රීඩා කළේය. ඔහු 2020 දී දකුණු අප්‍රිකාවේ පැවති U19 ලෝක කුසලානයට ද ක්‍රීඩා කළේය.
ESPNcricinfo වාර්තාකරණය මත පදනම්ව