ආසියානු කි්‍රඩා කාන්තා ක්‍රිකට් රන් පදක්කම් තරගයට ඉන්දියාව හා ශ්‍රී ලංකාව
ජාත්‍යන්තර ක්‍රිකට් කවුන්සිලයපුවත
බංග්ලාදේශය හමුවේ ලකුණු 114ක ආධිපත්‍යයෙන් යුත් ජයක් වාර්තා කරමින් කාර්යක්ෂම ඉන්දීය පිල ආසියානු කි්‍රඩා කාන්තා අවසන් මහා තරගයට සුදුසුකම් ලැබීය. මීට පෙර පාකිස්තානය පරදවා අවසන් මහා තරගයට පිවිසි ශ්‍රී ලංකාව ඔවුන්ගේ ප්‍රතිවාදීන් වේ.
කාසියේ වාසිය දිනා පළමුව පන්දුවට පහර දීමට තීරණය කළ ඉන්දියාවේ ආරම්භක පිතිකාරිනියන් වූ ස්මෘති මන්දනා සහ ෂෆාලි වර්මා බලගතු පහරදීමේ දස්කමක් දැක්වූහ.
ආක්‍රමණශීලී පිතිකරණයක් ප්‍රදර්ශනය කළ ඔවුන් දෙදෙනා පවර්ප්ලේ පන්දුවාර තුළදී ඉන්දියාව 72/1 දක්වා ගෙන ගියහ. පන්දු 19කදී ලකුණු 37ක් ලබා ගත් මන්දනා ඒ අතරතුර කාන්තා T20I ක්‍රිකට් ඉතිහාසයේ වැඩිම ලකුණු ලාභිනිය බවට පත් වූ අතර, පවර්ප්ලේ කොටසේ අවසන් පන්දුවේදී නහීදා අක්තර්ට කඩුල්ල ලබා දුන්නාය.
ජී කමලිනි ඉන් ටික වේලාවකට පසු සන්ජිදා අක්තර් මෙග්ලාට කඩුල්ල ලබා දුන් නමුත්, ෂෆාලි වර්මා හර්මන්ප්‍රීත් කෞර් සමග එක්ව එම වේගය පවත්වා ගත්තාය. ඔවුන් දෙදෙනා පන්දු 55කදී ලකුණු 94ක සබඳතාවක් ගොඩනැගූහ.
පන්දු 24කදී හයේ පහරකින් අර්ධ ශතකය සම්පූර්ණ කළ ෂෆාලි, වේගය අඩු නොකර පහරදීම දිගටම කරගෙන ගොස් පන්දු 49කදී සිය මංගල T20I ශතකය වාර්තා කළාය. එම ශතකය හතරේ පහර තුනකින් සහ හයේ පහර නවයකින් සමන්විත විය. හර්මන්ප්‍රීත් පන්දු 33කදී ලකුණු 40ක් ලබා දුන් අතර, ඉන්දියාව 195/4ක් ලෙස ඉනිම නිම කළේය.
ආරම්භයේ සිටම ඉදිරිපෙළින් පන්දු යැවූ ඉන්දීය පන්දු යවන්නියන් බංග්ලාදේශයට ඉලක්කය හඹා යාමේදී ස්ථාවර වීමට ඉඩ නොදුන්හ. දෙවැනි පන්දුවාරයේදී ජුවයිරියා ෆර්දවුස් දවා ගනිමින් නන්දනි ශර්මා පහර එල්ල කළ අතර, පසුව ක්‍රාන්ති ගෞඩ් සහ ශ්‍රී චරණි ශෝභනා මොස්ටරි සහ නිගාර් සුල්තානාගේ වැදගත් කඩුලු දවා ගනිමින් පීඩනය තවත් වැඩි කළහ.
තරගය මත සිය ග්‍රහණය තහවුරු කරගත් ඉන්දියාවට එරෙහිව බංග්ලාදේශය පවර්ප්ලේ කොටස අවසානයේ 39/3ක් ලෙස අසීරුවට පත් විය.
නිතර නිතර කඩුලු දවා ගනිමින් ඉන්දියාව බංග්ලාදේශ පිතිකාරිනියන්ට ස්ථාවර වීමට ඉඩ නොතැබීය. බංග්ලාදේශය වෙනුවෙන් වැඩිම ප්‍රතිරෝධය දැක්වූ දිලාරා අක්තර් පන්දු 23කදී ලකුණු 27ක් ලබා වැඩිම ලකුණු ලාභිනිය වූවත්, ඉන්දීය පන්දු යැවීමේ ප්‍රහාරයට මුහුණ දීම අවසානයේ අසීරු විය.
පන්දුවාර 15.4කදී බංග්ලාදේශයේ සියලු දෙනා ලකුණු 81කට දවා ගත් ඉන්දියාව සම්පූර්ණ ජයක් සහිතව අවසන් මහා තරගයට පිවිසියේය. නන්දනි ශර්මා (3/25), දීප්ති ශර්මා (3/7) සහ ශ්‍රී චරණි (2/7) ඉන්දියාව වෙනුවෙන් පන්දු යැවීමේදී විශිෂ්ට දස්කම් දැක්වූ අතර, ක්‍රාන්ති ගෞඩ් සහ ශ්‍රේයංකා පටීල් කඩුල්ල බැගින් දවා ගත්හ.
නිෂ්ෂින්හි පැවති පෙර තරගයේදී කාසියේ වාසිය දිනූ ශ්‍රී ලංකාව පාකිස්තානයට පළමුව පන්දුවට පහර දීමට ආරාධනා කළේය. තරගයේ පළමු පන්දුවෙන්ම ගුල් ෆෙරෝසාගේ කඩුල්ල උදුරා ගත් සුගන්දිකා කුමාරි (1/31) දිවයිනට සිහින ආරම්භයක් ලබා දුන්නාය.
නායිකා චමරි අතපත්තු (1/30) සහ හර්ෂිතා සමරවික්‍රම එක්ව සයිරා ජබීන් දවා ගැනීමත් සමග පාකිස්තානයට පවර්ප්ලේ කොටසේදී තවත් කඩුල්ලක් අහිමි විය.
ඉන්පසු ආරම්භක පිතිකාරිනිය ෂවාල් සුල්ෆිකාර් (පන්දු 50කදී ලකුණු 54ක්) සහ අයේෂා සෆාර් (පන්දු 40කදී ලකුණු 71ක්) එක්ව ලකුණු 115ක වාර්තාගත සබඳතාවක් ගොඩනැගූ අතර, එය මෙම ආකාරයේ තෙවැනි කඩුල්ලට පාකිස්තානයේ වැඩිම සබඳතාව විය.
දිවීමේදී දැවීමකින් සෆාර් ඉවත් වූ අතර, සුල්ෆිකාර් ද ඉන් ටික වේලාවකට පසු දැවී ගියාය. එහෙත් ෆාතිමා සනාගේ පන්දු 12කදී ලබා ගත් වේගවත් ලකුණු 20 නිසා පාකිස්තානය පන්දුවාර 20 අවසානයේ 177/4ක් ලෙස ලකුණු රැස් කළ අතර, එය ශ්‍රී ලංකාවට එරෙහිව ඔවුන්ගේ වැඩිම ලකුණු සංඛ්‍යාව විය.
නායිකා චමරි අතපත්තු පන්දු 50කදී නොදැවී ලකුණු 83ක් ලබා ගනිමින් දැක්වූ දස්කම මත ශ්‍රී ලංකාව ඉලක්කයක් හඹා යමින් ලබා ගත් තම වැඩිම ලකුණු සංඛ්‍යාව සමකරමින් ආසියානු කි්‍රඩා කාන්තා ක්‍රිකට් රන් පදක්කම් තරගයට සුදුසුකම් ලැබීය.
ආරම්භක පිතිකාරිනිය ඉමේෂා දුලානි (පන්දු 21කදී ලකුණු 27ක්) මුල සිටම හොඳ ආරම්භයක් ලබා දෙමින් අතපත්තුට ස්ථාවර වීමට ඉඩ සැලසුවාය. අටවැනි පන්දුවාරයේදී ශ්‍රී ලංකා නායිකාව මොමිනා රියාසත්ට හයේ පහර දෙකක් සහ හතරේ පහර දෙකක් ද ඇතුළුව ලකුණු 20ක් එල්ල කිරීමත් සමග තරගයේ ගමන් මග වෙනස් විය.
ඉන්පසු හසිනි පෙරේරා පන්දු 26කදී ලකුණු 42ක් ලබමින් නායිකාවගේ වේගයට සමව පහර දුන් අතර, නෂ්රා සන්ධුට කඩුල්ල ලබා දෙන විට ජය සඳහා අවශ්‍යතාව පන්දු 36කදී ලකුණු 47ක් දක්වා අඩු වී තිබිණි. සමරවික්‍රම සහ අතපත්තු පන්දුවාර 2.1ක් ඉතිරිව තිබියදී පහසුවෙන් ඉලක්කය හඹා ගියහ.
සැප්තැම්බර් 22 වැනිදා පාකිස්තානය හා බංග්ලාදේශය ලෝකඩ පදක්කම් තරගයේදී ගැටෙන අතර, එදිනම ඉන්දියාව සහ ශ්‍රී ලංකාව රන් පදක්කම් තරගයේදී මුහුණ දෙති.
ජාත්‍යන්තර ක්‍රිකට් කවුන්සිලය වාර්තාකරණය මත පදනම්ව