ඉන්දීය දඟ පන්දු යවන්නිය මෙතෙක් වාර්තා වූ ඉහළම T20I පන්දු යවන්නියන්ගේ ශ්‍රේණිගත ලකුණු අගයට ළඟා වෙයි
ජාත්‍යන්තර ක්‍රිකට් කවුන්සිලයපුවත
ඩුබායිහිදී ඉන්දියාව ලැබූ ජයග්‍රාහී ආසියානු කුසලාන ශූරතාවත් සමඟ එරට ක්‍රීඩිකාවන් රැසක් ICC කාන්තා T20I ක්‍රීඩිකා ශ්‍රේණිගත කිරීම්හි කැපී පෙනෙන ප්‍රගතියක් ලබා ඇත.
කණ්ඩායම් අටකින් යුත් තරගාවලියේ අවසන් මහා තරගයේදී ඉන්දියාව ශ්‍රී ලංකාවට එරෙහිව ලකුණු 72ක පහසු ජයක් ලබමින් පෙර නොවූ විරූ අටවැනි ආසියානු කුසලාන ශූරතාව දිනාගත් අතර, ශෆාලි වර්මා, දීප්ති ෂර්මා සහ ශ්‍රී චරණි වැනි සීමිත පන්දුවාර තරු ඊට පෙරමුණ ගත්හ.
ඩුබායි ජාත්‍යන්තර ක්‍රිකට් ක්‍රීඩාංගණයේ පැවති ශූරතාව තීරණය කළ එම තරගයේදී කඩුලු හතරක් දවාගත් චරණි, තරගාවලිය කඩුලු 12ක් සමඟ අවසන් කළාය. නවතම ශ්‍රේණිගත කිරීම් යාවත්කාලීන කිරීමේදී නව සන්ධිස්ථානයකට පිවිසි වමත් පන්දු යවන්නිය T20I පන්දු යවන්නියන්ගේ ශ්‍රේණිගත කිරීම්හි පෙරමුණ තවදුරටත් පුළුල් කරමින් ලකුණු 800 සීමාව පසු කළ පළමු ඉන්දීය පන්දු යවන්නිය බවට පත්වූවාය.
T20I පන්දු යවන්නියන්ගේ ශ්‍රේණිගත කිරීම්හි චරණිගේ ලකුණු 802ට වඩා ඉහළ අගයකට ළඟාවී ඇත්තේ ලකුණු 806ක් ලබාගත් ඕස්ට්‍රේලියානු වේග පන්දු යවන්නියක වන මේගන් ෂට් පමණි. ඒ අනුව ඉන්දීය දඟ පන්දු යවන්නිය, විශිෂ්ට ලකුණු 800 සීමාවට ළඟාවූ එකම ක්‍රීඩිකාවන් ලෙස එංගලන්ත දඟ පන්දු යවන්නියක වන සෝෆි එක්ල්ස්ටන් (802) ද ඇතුළත් සුවිශේෂී කණ්ඩායමට එක්වූවාය.
ශ්‍රේණිගත කිරීම්හි චරණිගේ සමීපතම ප්‍රතිවාදිනිය බවට දැන් පත්ව සිටින්නේ කණ්ඩායම් සග දීප්ති ෂර්මාය. අවසන් මහා තරගයේ 3/19ක පන්දු යැවීම ද ඇතුළුව ආසියානු කුසලාන තරගාවලියේදී කඩුලු 14ක් දවාගත් තරු තුන් ඉරියව් ක්‍රීඩිකාව ස්ථාන හතරක් ඉදිරියට පැමිණ T20I පන්දු යවන්නියන්ගේ ලැයිස්තුවේ දෙවැනි ස්ථානයට පත්වූවාය.
තරගාවලියේ වැඩිම ලකුණු ලෙස ලකුණු 236ක් පිතිකරණ සාමාන්‍යය 47.20ක් සමඟ රැස්කළ ශෆාලි, තරු පිරි මෙම ලැයිස්තුවේ එක් ස්ථානයක් ඉදිරියට පැමිණ හයවැනි තැනට පත්වීමෙන් T20I පිතිකාරිනියන්ගේ ශ්‍රේණිගත කිරීම්හි ඉන්දියාවට තවත් සතුටුදායක ප්‍රතිඵලයක් හිමිවිය. එම දස්කම ඇයට T20I තුන් ඉරියව් ක්‍රීඩිකාවන්ගේ ලැයිස්තුවේ ද ස්ථාන පහක් ඉදිරියට පැමිණ 15 වැනි ස්ථානයට පත්වීමට උපකාරී විය.
T20I පිතිකාරිනියන්ගේ ශ්‍රේණිගත කිරීම්හි පෙරමුණ තවමත් ඕස්ට්‍රේලියානු ක්‍රීඩිකාවන් වන බෙත් මූනි සහ ජෝර්ජියා වොල් සතුය. ආසියානු කුසලාන තරගාවලියේ දැක්වූ දක්ෂතා හේතුවෙන් ඉදිරියට පැමිණි සෙසු ක්‍රීඩිකාවන් අතර නිගාර් සුල්තානා (එක් ස්ථානයක් ඉදිරියට පැමිණ සම 20 වැනි ස්ථානයට), ඉමේෂා දුලානි (ස්ථාන දෙකක් ඉදිරියට පැමිණ සම 20 වැනි ස්ථානයට), ෂාර්මින් අක්තර් සුප්තා (ස්ථාන තුනක් ඉදිරියට පැමිණ සම 40 වැනි ස්ථානයට) සහ ෂවාල් සුල්ෆිකාර් (ස්ථාන හතරක් ඉදිරියට පැමිණ 45 වැනි ස්ථානයට) ද සිටිති.
නවතම T20I පන්දු යවන්නියන්ගේ ශ්‍රේණිගත කිරීම්හි බංග්ලාදේශ ක්‍රීඩිකාවන් රැසක් ද ඉදිරියට පැමිණියහ. ආසියානු කුසලාන තරගාවලියේ දැක්වූ දක්ෂතා හේතුවෙන් මරුෆා අක්තර් (ස්ථාන තුනක් ඉදිරියට පැමිණ සම 15 වැනි ස්ථානයට), රබෙයා ඛාන් (ස්ථාන තුනක් ඉදිරියට පැමිණ 18 වැනි ස්ථානයට), සුල්තානා ඛාතුන් (ස්ථාන පහක් ඉදිරියට පැමිණ 32 වැනි ස්ථානයට) සහ ෆහීමා ඛාතුන් (ස්ථාන හයක් ඉදිරියට පැමිණ 49 වැනි ස්ථානයට) පත්වූහ.
ජාත්‍යන්තර ක්‍රිකට් කවුන්සිලය වාර්තාකරණය මත පදනම්ව