ග්‍රීන්ගේ දස්කම් හමුවේ ජය ලැබූ ට්‍රයිඩන්ට්ස් අවසන් ස්ථානයෙන් ඉහළට

බාර්බඩෝස් ට්‍රයිඩන්ට්ස් 120ට 6යි (ඩි කොක් 44*යි, හෝල්ඩර් 3-31යි, නසීම් 2-11යි) ශාන්ත කිට්ස් සහ නේවිස් පේට්‍රියට්ස් 118 (හසරංග 45යි, ග්‍රීන් 4-20යි, සැම්ස් 2-21යි, මෝටි 2-30යි) කඩුලු හතරකින් පරාජය කළේය

ක්‍රිස් ග්‍රීන් දවාගත් කඩුලු හතරේ දස්කම හේතුවෙන් බ්‍රහස්පතින්දා පැවති CPL 2026 තරගයේදී ශාන්ත කිට්ස් සහ නේවිස් පේට්‍රියට්ස් පිලට එරෙහිව කඩුලු හතරක ජයක් ලැබීමට බාර්බඩෝස් ට්‍රයිඩන්ට්ස් සමත් විය.

මෙම ප්‍රතිඵලයත් සමඟ තරග අටකින් ප්‍රසාද ලකුණු අටක් ලබාගත් ට්‍රයිඩන්ට්ස්, ලකුණු සටහනේ අවසන් ස්ථානයේ සිට සිව්වැනි ස්ථානය දක්වා ඉහළට පැමිණියේය. නවතම පරාජයෙන් පසු පේට්‍රියට්ස් හයවැනි ස්ථානයේ පසු විය.

Sportway.lk:පිළිගැනීමේ ප්‍රසාද මුදලRs. 10,000 දක්වා ලබාගන්න!තැන්පතුවට 50% ප්‍රසාද මුදලක් භුක්ති විඳින්නප්‍රසාද මුදල ලබාගන්න* නියමයන් සහ කොන්දේසි අදාළ වේSportway.lk:පිළිගැනීමේ ප්‍රසාද මුදලRs. 10,000 දක්වා ලබාගන්න!තැන්පතුවට 50% ප්‍රසාද මුදලක් භුක්ති විඳින්නප්‍රසාද මුදල ලබාගන්න* නියමයන් සහ කොන්දේසි අදාළ වේ

පළමුව පන්දුවට පහර දීමට ඇරයුම් ලැබූ පේට්‍රියට්ස් ආරම්භයේ සිටම අසීරුතාවට පත්වූ අතර, ලකුණු හයකට කඩුලු තුනක් අහිමි කර ගත්තේය. ජොන්සන් චාල්ස්, කයිල් මේයර්ස් සහ ඇන්ඩ්‍රේ ෆ්ලෙචර්ට සාර්ථක ආරම්භයක් ලබාගත නොහැකි වීමෙන් පේට්‍රියට්ස් මුල් අවස්ථාවේදීම පීඩනයට ලක් විය. එම කඩුලු තුනෙන් දෙකක්ම ග්‍රීන් දවා ගත්තේය. ඇලික් අතනාසේ සහ ජේසන් හෝල්ඩර් ඉනිම ගොඩනැගීමට උත්සාහ කළද, තීරණාත්මක කඩුලු දවාගැනීම දිගටම සිදු කළ ග්‍රීන්, අතනාසේ දවාගත් අතර ඉන් වැඩි වේලාවක් ගතවීමට පෙර දසුන් ශානක ද පිටියෙන් ඉවත් කළේය.

12 වැනි පන්දුවාරයේදී හෝල්ඩර් දැවී යන විට ලකුණු 51කට කඩුලු 6ක් අහිමිව සිටි පේට්‍රියට්ස් තවත් දැඩි අසීරුතාවකට පත්ව තිබූ නමුත්, ඉන් අනතුරුව වනිඳු හසරංග ප්‍රතිප්‍රහාරයක් දියත් කළේය. හතරේ පහර හතරක් සහ හයේ පහර තුනක් ඇතුළත් වූ පන්දු 25කින් රැස්කළ වේගවත් ලකුණු 45 ඉනිමට යම් ජවයක් එක් කළේය. ජෙරමියා ලුවී පන්දු අටකින් ලකුණු 12ක් එක් කළද, ඉනිමේ අවසන් පන්දුවේදී සියලු දෙනා දැවී ගිය පේට්‍රියට්ස්ට රැස්කරගත හැකි වූයේ ලකුණු 118ක් පමණි.

සිය පන්දුවාර හතරේදී ලකුණු 20කට කඩුලු 4ක් දවා ගනිමින් ග්‍රීන් විශිෂ්ට පන්දු යැවීමක නිරත වූ නමුත්, ඔහුගේ බලපෑම පන්දු යැවීමට පමණක් සීමා නොවීය. උඩ පන්දු දෙකක් ද රැකගත් ඔහු, තීරණාත්මක වූ තුන් ඉරියව් දායකත්වය වෙනුවෙන් තරගයේ වීරයා සම්මානය දිනා ගත්තේය.

ට්‍රයිඩන්ට්ස් පිලේ ඉලක්කය හඹා යාම දුර්වල ලෙස ඇරඹුණු අතර, ආරම්භක පන්දුවාරය තුළදීම බ්‍රැන්ඩන් කිං සහ රිවාල්ඩෝ ක්ලාක් දැවී ගියහ. ඉන් අනතුරුව හෝල්ඩර්ගේ තෙවැනි ගොදුර බවට පත්වූ සැකරි කාටර් ද ඉක්මනින් දැවී ගියේය. ලකුණු 27කට කඩුලු 3ක් අහිමිව ට්‍රයිඩන්ට්ස් අසීරු තත්ත්වයක පසු විය.

කෙසේ වෙතත්, ක්වින්ටන් ඩි කොක් පන්දු 43කින් නොදැවී ලකුණු 44ක් රැස් කරමින් ඉනිම රඳවා ගත්තේය. ෂැඩ්රැක් ඩෙස්කාට් රැස්කළ ලකුණු 19 සහ ෂර්ෆේන් රදර්ෆර්ඩ් පන්දු 17කින් වේගවත් ලෙස රැස්කළ ලකුණු 23 වටිනා සහායක් සැපයූ අතර, අනතුරුව ඩැනියෙල් සැම්ස් පන්දු හතරකින් නොදැවී ලකුණු නවයක් රැස් කරමින් ඉලක්කය හඹා යාම අවසන් කළේය.

පේට්‍රියට්ස් වෙනුවෙන් හෝල්ඩර් කඩුලු තුනක් දවාගත් අතර නසීම් ෂා කඩුලු දෙකක් දවා ගත්තේය. එහෙත් ඔවුන්ගේ පිතිකරණ බිඳවැටීම තරගයේ තීරණාත්මක වෙනස බවට පත් විය.