ෆ්ලෙමින්: එංගලන්තය පුහුණු කළ යුත්තේ එංගලන්ත ජාතිකයෙකි
ESPNcricinfoපුවත
එංගලන්ත ටෙස්ට් පුහුණුකරු ලෙස සිය ධුර කාලයේ මූලික අරමුණක් ලෙස එංගලන්ත පුහුණුකරුවන් බිහි කිරීම සිදු කරන බව නවසීලන්ත ජාතිකයා ප්‍රතිඥා දෙයි
එංගලන්තයේ නව ටෙස්ට් පුහුණුකරු ස්ටීවන් ෆ්ලෙමින් විශ්වාස කරන්නේ එම තනතුර වඩාත් සුදුසු ලෙස හෙබවිය යුත්තේ එංගලන්ත ජාතිකයෙකු විසින් බවය. එංගලන්ත පුහුණුකරුවන් බිහි කිරීම සිය ධුර කාලයේ මූලික කරුණක් බවට පත් කරන බවට ද ඔහු ප්‍රතිඥා දී ඇත.
මේ වසර මුලදී වසර හතරක කොන්ත්‍රාත්තුවකට එකඟ වෙමින් බ්‍රෙන්ඩන් මැකලම්ගෙන් පසුව එම ධුරය භාර ගැනීමත් සමඟ, ෆ්ලෙමින් එම තනතුර දරන එකදිගට දෙවැනි නවසීලන්ත ජාතිකයා වේ. එංගලන්තය විදේශයන්ගෙන් ටෙස්ට් පුහුණුකරුවන් සොයා ගැනීමේ ප්‍රවණතාව මෙයින් තවදුරටත් ඉදිරියට යන අතර, 21 වැනි සියවසේදී පූර්ණකාලීනව එම ධුරය දැරූයේ එංගලන්ත ජාතිකයන් දෙදෙනෙකු පමණි - පීටර් මුවර්ස් (2007-09 සහ 2014-15) සහ ක්‍රිස් සිල්වර්වුඩ් (2019-22).
ෆ්ලෙමින්ගේ අලුතින් පත් කරන ලද සහාය කාර්ය මණ්ඩලයේ අනාගතයේ ටෙස්ට් පුහුණුකරුවන් විය හැකි කිහිප දෙනෙකු සිටින අතර, රිචඩ් ඩෝසන්, ජේම්ස් ෆොස්ටර් සහ මේ වසර මුලදී තාවකාලික පදනමින් එම ධුරය දැරූ මාකස් ට්‍රෙස්කොතික් ඔවුන් අතර වෙති. තවත් හිටපු එංගලන්ත ක්‍රීඩකයෙකු වන ජොනතන් ට්‍රොට් මෙම ශීත ඍතුවේදී එංගලන්ත ලයන්ස් පිල පුහුණු කරන අතර, මයික් යාඩි ECB හි ජාතික පිතිකරණ ප්‍රධානියා ලෙස පත් කර තිබේ.
“මගේ එක් අවධානයක් වන්නේ, මූලික වශයෙන්ම ජාතික කණ්ඩායම පුහුණු කළ යුත්තේ ජාතික නියෝජිතයෙකු විසින් බවට මා තුළ විශ්වාසයක් තිබීමයි,” යැයි BBC Radio 5 Live සමඟ අදහස් දක්වමින් ෆ්ලෙමින් පැවසීය.
“මෙම අවස්ථාව ලැබීම ගැන මම කෘතඥ වෙනවා. නමුත් පුහුණු කිරීම සම්බන්ධයෙන් යම් දියුණුවක් සිදු වෙයි. අපේ කාර්ය මණ්ඩලය දිහා බැලුවම පේනවා ඇත්තටම වැදගත් පිරිසක් නැවත පද්ධතියට ඇවිත් තියෙනවා කියලා. ඒ ගැන මම ඇත්තටම සතුටු වෙනවා, ඔවුන් සමඟ වැඩ කරන්න මම බලාපොරොත්තුවෙන් ඉන්නවා. නමුත් එය [එංගලන්ත පුහුණුකරුවන් බිහි කිරීම] සැබෑ අවධානයක්,” යැයි ද ඔහු පැවසීය.
ජාතික දඟ පන්දු යැවීමේ ප්‍රධානියා සහ ෆ්ලෙමින්ගේ සහායකයෙකු යන ද්විත්ව භූමිකාව භාර ගැනීම සඳහා ඩෝසන් මේ මස මුලදී ග්ලැමෝර්ගන් ප්‍රධාන පුහුණුකරු ධුරයෙන් ඉල්ලා අස් විය. ඉදිරි වසරවලදී ෆ්ලෙමින්ගේ අනුප්‍රාප්තිකයා පත් කිරීමේ කාලය පැමිණි විට ඔහු “එම ලැයිස්තුවේ ඉහළින්ම” සිටිනු ඇති බව එංගලන්තයේ කළමනාකාර අධ්‍යක්ෂ රොබ් කී ඉඟි කළේය.
කවුන්ටි පුහුණුකරුවන්ගේ දියුණුව තවදුරටත් වර්ධනය කිරීම සඳහා ඔවුන්ගේ කාලසටහන් ඉඩ දෙන විටෙක ඔවුන් කිහිප දෙනෙකු එංගලන්ත පද්ධතියට ගෙන ඒමේ අදහසක් ඇති බව ද ෆ්ලෙමින් තහවුරු කළේය.
“යම් යම් අවස්ථාවලදී කවුන්ටි පුහුණුකරුවන් හඳුන්වා දීමත්, හිටපු ක්‍රීඩකයන්ට නැවත එන්න කියා ආරාධනා කිරීමත් මගේ අපේක්ෂාවක්,” යැයි ඔහු පැවසීය. “එය ඇත්තටම සැමට ඉඩ දෙන, අවට ඇති දේ භාවිත කිරීමේ පහසු ස්වභාවයක්. ඒ වගේම කවුන්ටි ක්‍රීඩාව තුළත් එංගලන්ත ක්‍රීඩාව තුළත් කළ යුතු දේ ඉදිරියට ගෙන යාමක්.”
අගෝස්තු-සැප්තැම්බර් මාසවලදී පාකිස්තානයට එරෙහි ජයග්‍රහණයේදී ට්‍රෙස්කොතික් වැඩ බලා කටයුතු කළ අතර, දෙසැම්බර් මාසයේදී එංගලන්තය දකුණු අප්‍රිකාවට යන තෙක් ෆ්ලෙමින් සිය පළමු තරගාවලියේ වගකීම භාර ගන්නේ නැත. පසුගිය මාසයේදී එක්සත් රාජධානියට ගිය ෆ්ලෙමින් තොරතුරු සොයා බැලීමේ චාරිකාවක් ලෙස කවුන්ටි කණ්ඩායම් නැරඹූ අතර, මැකලම් සමඟ පැහැදිලි වෙනසක් පෙන්වමින්, ලබන ගිම්හානයේ ඇෂස් තරගාවලියට පෙර ද එවැනිම දෙයක් කරන බව පැවසීය.
“ඔව්, මම අවට ඉන්නවා,” යැයි ෆ්ලෙමින් පැවසීය. “මා සමඟ ක්‍රීඩා කළ, දැන් කවුන්ටි කණ්ඩායම්වල පුහුණුකරු හෝ ප්‍රධානියා වශයෙන් තනතුරුවල සිටින බොහෝ දෙනෙක් හමු වීම මේ වසරේ මම ඇත්තටම රසවිඳිනවා. ඒ අය හමු වී කවුන්ටි ක්‍රීඩාව කොතැනද කියන එක ගැන හොඳ හැඟීමක් ගන්න ලැබීම හොඳයි… ක්‍රීඩකයන් දිගටම ගොඩනැඟීමේදී එය ප්‍රධාන අංගයක් වෙයි.”
දකුණු අප්‍රිකාවේදී ප්‍රධාන පෙළේ දඟ පන්දු යවන්නෙකු නොමැතිව එංගලන්තය දිගටම කටයුතු කරනු ඇති බවත්, ඒ වෙනුවට ජේකබ් බෙතෙල්, ඩෑන් ලෝරන්ස් සහ ජෝ රූට් යන අර්ධකාලීන විකල්ප මත විශ්වාසය තබනු ඇති බවත් ෆ්ලෙමින් තරයේ ඉඟි කළේය.
“[ටෙස්ට් ක්‍රිකට් තුළ] පිටි තරමක් වැඩියෙන් වේග පන්දු යවන්නන්ට හිතකර වෙමින් තියෙනවා,” යැයි ඔහු පැවසීය. “තරග දින තුනහමාරේ සිට උපරිම දින හතරකින් අවසන් වෙනවා. ඩ්‍රොප්-ඉන් පිටිවල පැමිණීමත් සමඟ, කලින් දකින්න ලැබුණු විදියට බොහෝ පිටිවල ක්ෂය වීමක් දැන් දකින්න ලැබෙන්නේ නැහැ. ඒ නිසා [දඟ පන්දු යවන්නන්ට] එය වඩාත් අභියෝගාත්මක වෙනවා.
“දැන් දකින්න ලැබෙන්නේ අර්ධකාලීන දඟ පන්දු යවන්නාගේ නැගීමයි: අපේ අවස්ථාවේදී බෙතෙල්ලා, ලෝරන්ස්ලා සහ රූට්ලා. ඊට වේග පන්දු යවන්නන් හතර දෙනෙක් එකතු කළාම, ටෙස්ට් තරගයක් ගෙවා දමන්න ප්‍රමාණවත් - නැත්නම් ප්‍රමාණවත්ටත් වඩා වැඩි - පන්දු යැවීමේ ශක්තියක් තියෙනවා. ඒ නිසා මේ මොහොතේ එහි ස්වභාවය ඇත්තටම වෙනස් වෙලා.”
ESPNcricinfo වාර්තාකරණය මත පදනම්ව