යළි ඇරඹුණු STC එලිෆන්ට් හවුස් ලෙමනේඩ් සය සාමාජික තරගාවලියේ කේම්බ්‍රියන්වරු කිරුළු පළඳිති
ThePapareපුවත
දශක කිහිපයක විරාමයකින් පසු දිවයිනේ කීර්තිමත්ම පාසල් ක්‍රිකට් තරගාවලියක් වන එලිෆන්ට් හවුස් ලෙමනේඩ් සය සාමාජික තරගාවලිය සාර්ථකව යළි ඇරඹුණේය. සත්කාරක පාසලේ ඓතිහාසික 175 වැනි සංවත්සර සැමරුමට සමගාමීව STC–එලිෆන්ට් හවුස් ලෙමනේඩ් කුසලාන ආරාධිත පාසල් සය සාමාජික ක්‍රිකට් තරගාවලිය ගල්කිස්ස එස්. තෝමස් විද්‍යාල ක්‍රීඩාංගණයේදී යළි පැවැත්විණි.
දිවයින පුරා ප්‍රමුඛ පාසල් ක්‍රිකට් කණ්ඩායම් සහභාගි වූ තරගාවලිය ඉහළ උද්වේගයක් සහිත විනෝදාස්වාදයක් සැපයීය. දින කිහිපයක තියුණු තරගකාරිත්වයෙන් පසු මොරටුව වේල්ස් කුමර විද්‍යාලය අවසන් මහා තරගයේදී කොළඹ රාජකීය විද්‍යාලය ලකුණු 21කින් පරාජය කරමින් ප්‍රබල දස්කමක් දක්වා කුසලාන ශූරතාව දිනා ගත්තේය.
ශූරතාව කරා ගිය මඟ උද්වේගකර තරගවලින් පිරී තිබුණේය. පෙර අර්ධ අවසන් පූර්ව වටයේදී කොළඹ රාජකීය විද්‍යාලය, ගාල්ල රිච්මන්ඩ් විද්‍යාලය, කොටහේන ශාන්ත බෙනඩික්ට් විද්‍යාලය, ගාල්ල මහින්ද විද්‍යාලය, වෙස්ලි විද්‍යාලය, කටුගස්තොට ශාන්ත අන්තෝනි විද්‍යාලය, ආනන්ද විද්‍යාලය සහ වේල්ස් කුමර විද්‍යාලය අර්ධ අවසන් පූර්ව වටයට පිවිසියහ. ඔවුහු පිළිවෙළින් මහනුවර ත්‍රිත්ව විද්‍යාලය, කොළඹ ශාන්ත ජෝසප් විද්‍යාලය, කොළඹ නාලන්දා විද්‍යාලය, මොරටුව ශාන්ත සෙබස්තියන් විද්‍යාලය, යාපනය ශාන්ත ජෝන් විද්‍යාලය, මීගමුව මාරිස් ස්ටෙලා විද්‍යාලය, ගල්කිස්ස එස්. තෝමස් විද්‍යාලය සහ කුරුණෑගල මලියදේව විද්‍යාලය පරාජය කළහ.
අර්ධ අවසන් පූර්ව වටය ද නාට්‍යමය සිදුවීම්වලින් පිරී තිබුණේය. කොළඹ රාජකීය විද්‍යාලය රිච්මන්ඩ් විද්‍යාලය ලකුණු 23කින් පහසුවෙන් පරාජය කළේය. ඉහළ ලකුණු වාර්තා වූ තරගයකදී ශාන්ත බෙනඩික්ට් විද්‍යාලය, මහින්ද විද්‍යාලයට එරෙහි ලකුණු 93ක ඉලක්කය සාර්ථකව හඹා ගියේය. තියුණු තරගයකදී වෙස්ලි විද්‍යාලය ශාන්ත අන්තෝනි විද්‍යාලය ලකුණු 16කින් පරාජය කළ අතර, වේල්ස් කුමර විද්‍යාලය ආනන්ද විද්‍යාලයට එරෙහිව ලකුණු 67ක දැවැන්ත ජයක් ලබා කුසලාන අවසන් පූර්ව වටයට පිවිසියේය.
අර්ධ අවසන් පූර්ව වටයේ අමතක නොවන අවස්ථාවක් නිර්මාණය කළේ මහින්ද විද්‍යාල නායක දුල්සිත් දර්ශනයි. කණ්ඩායම පරාජය වුවද ශාන්ත බෙනඩික්ට් විද්‍යාලයේ ටෙහාන් බිටාර්ට එරෙහිව ප්‍රහාරාත්මක පිතිහරඹයක නිරත වූ දර්ශන සියලු අවධානය දිනා ගත්තේය. ප්‍රබල පිතිකරු ඩීප් ස්ක්වෙයාර් ලෙග් සහ ඩීප් මිඩ්විකට් පන්දු රකින්නන්ට ඉහළින් හයේ පහර 6ක් එල්ල කර, නිපන්දුවක් ද ඇතුළත් එක් පන්දුවාරයකින් විස්මිත ලකුණු 41ක් රැස් කළේය. එහෙත් ශාන්ත බෙනඩික්ට් ක්‍රීඩකයෝ සන්සුන්ව විශිෂ්ට ප්‍රතිප්‍රහාරයක් දියත් කර තරගය ජය ගත්හ.
පළමු අවසන් පූර්ව තරගයේදී කොළඹ රාජකීය විද්‍යාලය, ශාන්ත බෙනඩික්ට් විද්‍යාලය ලබාදුන් අභියෝගාත්මක ලකුණු 70ක ඉලක්කය හඹා ගොස් කඩුලු 3ක ජයක් සමඟ අවසන් මහා තරගයට සුදුසුකම් ලැබීය.
වෙස්ලි විද්‍යාලය සහ වේල්ස් කුමර විද්‍යාලය අතර පැවති දෙවැනි අවසන් පූර්ව තරගය තරගාවලියේ හොඳම තරගය ලෙස සැලකිණි. අවසන් මොහොත දක්වාම ඇදී ගිය තරගය උද්වේගකර ලෙස සමවීමෙන් සුපිරි පන්දුවාරයක් පැවැත්විණි. දැඩි පීඩනය යටතේ සන්සුන්ව ක්‍රීඩා කළ වේල්ස් කුමර ක්‍රීඩකයෝ ලකුණු 19ක ඉලක්කය සාර්ථකව හඹා ගොස් අවසන් මහා තරගයේ ස්ථානය තහවුරු කර ගත්හ.
තීරණාත්මක කුසලාන අවසන් මහා තරගයේදී වේල්ස් කුමර විද්‍යාලය එක් කඩුල්ලක් පමණක් දැවී දැවැන්ත ලකුණු 94ක් රැස් කළේය. “ගෝල්ඩන් බෝයි” මතීෂ අපොන්සෝ තීරණාත්මක මොහොතේ නොදැවී ලකුණු 48ක් රැස් කරමින් ශූරතාව තීරණය කළ ඉනිමක් ක්‍රීඩා කළේය. දැඩි අභියෝගයකට මුහුණ දුන් රාජකීය විද්‍යාල පිතිකරුවෝ සටන්කාමීව ක්‍රීඩා කළද අවසානයේ ලකුණු 73කට සීමා වූහ. වේල්ස් කුමර විද්‍යාලය ලකුණු 21කින් ජයගෙන ප්‍රීති ඝෝෂා මධ්‍යයේ ගෞරවනීය කුසලානය ඔසවා ගත්තේය.
කුසලානය සඳහා සටන පැවැත්වෙන අතරතුර පළඟ ශූරතාව සඳහා ද දැඩි තරගකාරිත්වයක් දක්නට ලැබුණේය. ශාන්ත ජෝසප් විද්‍යාලය, නාලන්දා විද්‍යාලය, ශාන්ත ජෝන් විද්‍යාලය සහ එස්. තෝමස් විද්‍යාලය පිළිවෙළින් ත්‍රිත්ව විද්‍යාලය, ශාන්ත සෙබස්තියන් විද්‍යාලය, මාරිස් ස්ටෙලා විද්‍යාලය සහ මලියදේව විද්‍යාලය පරාජය කර අවසන් පූර්ව වටයට පිවිසියහ. පළඟ අවසන් පූර්ව තරගවලදී ශාන්ත ජෝසප් විද්‍යාලය නාලන්දා විද්‍යාලය ලකුණු 12කින් පරාජය කළේය. සත්කාරක එස්. තෝමස් විද්‍යාලය තරගාවලියේ “පෙරළිකාරයන්” වූ ශාන්ත ජෝන් විද්‍යාලයට එරෙහිව ලකුණු 16ක ජයක් ලබා අවසන් මහා තරගයට පිවිසියේය.
පළඟ අවසන් මහා තරගයේදී ශාන්ත ජෝසප් විද්‍යාලය ප්‍රබල ලකුණු 81ක් රැස් කළේය. එහෙත් ප්‍රීතිමත් සිය ප්‍රේක්ෂකයන් ඉදිරියේ එස්. තෝමස් විද්‍යාලය කිසිසේත් බියට පත් නොවීය. සත්කාරකයෝ එක් කඩුල්ලක් පමණක් දැවී ඉලක්කය හඹා ගියහ. විස්මිත තරග දිනවන දස්කමක් දැක්වූ රෙෂොන් සොලමන්ස් නොදැවී ලකුණු 69ක් රැස් කරමින් එස්. තෝමස් විද්‍යාලයට පළඟ ශූරතාව හිමි කර දුන්නේය.
තරගාවලිය උත්කර්ෂවත් සම්මාන ප්‍රදානෝත්සවයකින් නිමාවට පත්විය. හිටපු ශ්‍රී ලංකා ක්‍රිකට් ක්‍රීඩකයකු සහ එස්. තෝමස් විද්‍යාලයේ ආදි ශිෂ්‍යයකු වන චන්ද්‍රා ෂාෆ්ටර් ප්‍රධාන ආරාධිතයා ලෙස සහභාගි විය. හිටපු ශ්‍රී ලංකා ක්‍රිකට් ක්‍රීඩකයකු, ශ්‍රී ලංකා ක්‍රිකට් තේරීම් කමිටු සභාපතිවරයා සහ එස්. තෝමස් විද්‍යාලයේ ආදි ශිෂ්‍යයකු වන කපිල විජේගුණවර්ධන ගෞරවනීය ආරාධිතයා ලෙස එක්විය. තරග දිනවන දස්කම් රැසකින් පසු කේම්බ්‍රියන් ක්‍රීඩක මතීෂ අපොන්සෝ අවසන් මහා තරගයේ වීරයා සහ තරගාවලියේ වීරයා සම්මාන දෙකම දිනා ගත්තේය.
එලිෆන්ට් හවුස් ලෙමනේඩ් සය සාමාජික තරගාවලිය සාර්ථකව පැවැත්වීමෙන් අතීත ක්‍රීඩා සම්ප්‍රදායක් යළි පණගැන්වූවා පමණක් නොව, මෙරට නැඟී එන ක්‍රිකට් ක්‍රීඩකයන්ට ක්‍රීඩාවේ කෙටිම ආකෘතිය තුළ සිය දක්ෂතා ප්‍රදර්ශනය කිරීමට වේදිකාවක් ද සැපයුණේය.
කුසලාන ශූරතාව
කුසලාන අර්ධ අවසන් පූර්ව තරගය 1
රාජකීය විද්‍යාලය – 66/4 (පන්දුවාර 5)
දුෂේන් උඩුවෙල 31, මහිරු කොඩිතුවක්කු නොදැවී 10, බෙවින් ජයවර්ධන 2/09
රිච්මන්ඩ් විද්‍යාලය – සියලු දෙනා දැවී 42 (පන්දුවාර 3.3)
බෙවින් ජයවර්ධන 15, හිරුන් මතීෂ 2/07, ත්විඳු වේවැල්වල 2/14,
රාජකීය විද්‍යාලයට ලකුණු 24ක ජයක්
කුසලාන අර්ධ අවසන් පූර්ව තරගය 2
මොරටුව වේල්ස් කුමර විද්‍යාලය – 99/3 (පන්දුවාර 5)
මතීෂ අපොන්සු 38, නෙතුල් අනුහස් නොදැවී 28, රෂාන් විජේරත්න 2/14
ආනන්ද විද්‍යාලය – සියලු දෙනා දැවී 32 (පන්දුවාර 2.5)
ඕවින් පෙරේරා 15, මතීෂ අපොන්සු 2/07, ෂෙහාන් අෂේන් 2/11
මොරටුව වේල්ස් කුමර විද්‍යාලයට ලකුණු 67ක ජයක්
කුසලාන අර්ධ අවසන් පූර්ව තරගය 3
ගාල්ල මහින්ද විද්‍යාලය – 92/2 (පන්දුවාර 5)
දුල්සිත් දර්ශන නොදැවී 57, සෙහස් අෂින්ස 24, මිහිල ජයවීර 1/16
කොටහේන ශාන්ත බෙනඩික්ට් විද්‍යාලය – 93/1 (පන්දුවාර 4)
ලිතික ජයසුන්දර නොදැවී 36, මාරියෝ ප්‍රනාන්දු 30, කවීෂ ගිත්මල් 1/15
කොටහේන ශාන්ත බෙනඩික්ට් විද්‍යාලයට කඩුලු 4ක ජයක්
කුසලාන අර්ධ අවසන් පූර්ව තරගය 4
වෙස්ලි විද්‍යාලය – 72/4 (පන්දුවාර 5)
ගයුක ප්‍රනාන්දු නොදැවී 24, චරණ මලිම්බඩ නොදැවී 14, සනිතු ගුණතිලක 2/06
කටුගස්තොට ශාන්ත අන්තෝනි විද්‍යාලය – 56/0 (පන්දුවාර 5)
කෞෂික කුමාරසිංහ නොදැවී 45, සිසිල් හේමක නොදැවී 11
වෙස්ලි විද්‍යාලයට ලකුණු 16ක ජයක්
කුසලාන අවසන් පූර්ව තරගය 1
කොටහේන ශාන්ත බෙනඩික්ට් විද්‍යාලය – 69/3 (පන්දුවාර 5)
ටෙහාන් බිටාර් 37, හිමරු දේශාන් 1/03
කොළඹ රාජකීය විද්‍යාලය – 70/2 (පන්දුවාර 4)
හිරුන් ලියනාරච්චි 24, රෙහාන් පීරිස් 20, විහංග රත්නායක 1/17
රාජකීය විද්‍යාලයට කඩුලු 3ක ජයක්
කුසලාන අවසන් පූර්ව තරගය 2
මොරටුව වේල්ස් කුමර විද්‍යාලය – 86/1 (පන්දුවාර 5)
පළිඟු පෙරේරා නොදැවී 50, නෙතුල අනුහස් නොදැවී 18, ලිත්ම පෙරේරා 1/17
කොළඹ වෙස්ලි විද්‍යාලය: 86/3 (පන්දුවාර 5)
කවිඳු නිම්සර 39, සෙනුර ලක්ෂාන් නොදැවී 28, ඕජාෂ් ශංකර් 1/06
තරගය සමවීමෙන් සුපිරි පන්දුවාරයක් පැවැත්විණි
කොළඹ වෙස්ලි විද්‍යාලය – 18/1 (පන්දුවාර 1)
සෙනුර ලක්ෂාන් 16*, ඕජාෂ් ශංකර් 1/16
මොරටුව වේල්ස් කුමර විද්‍යාලය – 19/0 (0.4)
නෙතුල නොදැවී 07
මොරටුව වේල්ස් කුමර විද්‍යාලයට කඩුලු 2ක ජයක්.
පළඟ අවසන් පූර්ව තරගය 1
ශාන්ත ජෝසප් විද්‍යාලය – 79/3 (පන්දුවාර 5)
අවීෂ සමෂ් 31, නුෂාන් පෙරේරා නොදැවී 20, රසඳු සිල්වා 1/11
නාලන්දා විද්‍යාලය – 68/4 (පන්දුවාර 5)
නෙමිඳු අක්මීමන 32, රුසඳු සිල්වා නොදැවී 13, චේතන කවිඳ 1/10
ශාන්ත ජෝසප් විද්‍යාලයට ලකුණු 11ක ජයක්
පළඟ අවසන් පූර්ව තරගය 2
ගල්කිස්ස එස්. තෝමස් විද්‍යාලය – 83/2 (පන්දුවාර 5)
රෙෂොන් සොලමන්ස් නොදැවී 45, ස්ටෙවොන් පීරිස් 14, සිවනේෂ්වරන් කිෂාන්ත් 2/14
යාපනය ශාන්ත ජෝන්ස් විද්‍යාලය – 68/4 (පන්දුවාර 5)
සිවනේෂ්වරන් කිෂාන්ත් 20, ජේඩන් අමරවීර 2/06, ඇරන් ද සිල්වා 2/07
ගල්කිස්ස එස්. තෝමස් විද්‍යාලයට ලකුණු 15ක ජයක්
පළඟ අවසන් මහා තරගය
කොළඹ ශාන්ත ජෝසප් විද්‍යාලය – 81/1 (පන්දුවාර 5)
යෙනුල දන්තනාරායන නොදැවී 49, අවීෂ සමෂ් 22, ජේඩන් අමරවීර 1/13
ගල්කිස්ස එස්. තෝමස් විද්‍යාලය – 82/0 (පන්දුවාර 4.4)
රෙෂොන් සොලමන්ස් නොදැවී 69, ජේඩන් අමරවීර නොදැවී 13
ගල්කිස්ස එස්. තෝමස් විද්‍යාලයට කඩුලු 5ක ජයක්
කුසලාන අවසන් මහා තරගය
මොරටුව වේල්ස් කුමර විද්‍යාලය – 94/1 (පන්දුවාර 5)
මතීෂ අපොන්සෝ නොදැවී 48, නෙතුල අනුහස් නොදැවී 24
කොළඹ රාජකීය විද්‍යාලය – 73/0
රෙහාන් පීරිස් නොදැවී 51, හිරුන් මතීෂ නොදැවී 15
මොරටුව වේල්ස් කුමර විද්‍යාලයට ලකුණු 21ක ජයක්
පුද්ගල සම්මාන
දක්ෂතම පන්දු යවන්නා – හිරුන් ලියනාරච්චි (කොළඹ රාජකීය විද්‍යාලය)
දක්ෂතම පිතිකරු – රෙහාන් පීරිස් (කොළඹ රාජකීය විද්‍යාලය)
අවසන් මහා තරගයේ වීරයා – මතීෂ අපොන්සෝ (මොරටුව වේල්ස් කුමර විද්‍යාලය)
තරගාවලියේ වීරයා – මතීෂ අපොන්සෝ (මොරටුව වේල්ස් කුමර විද්‍යාලය).
ThePapare වාර්තාකරණය මත පදනම්ව